另類投資爆升 直擊百萬元掃酒

「你哋有幾多拉菲（ Lafite）存貨？有幾多我要幾多。」一名染了一小撮金髮、身穿便服的女士走進尖沙咀一間酒鋪，便直衝到收銀處說了這番話。
店員聽罷也見怪不怪，施施然將紅酒搬出來，她看罷嫌存貨不夠，索性叫店主把 Latour及 Mouton等名酒亦統統拿來。經過二十多分鐘揀貨，她最終以一百一十萬元港幣，買入二百多瓶紅酒，並即時拿了數萬元人民幣現鈔落訂，再找專人送返深圳。由於大堆銀紙點算困難，女士向職員說：「俾塊濕布我，好難數。」
記者上前採訪，深圳居民歐小姐指是替內地豪客買酒，每隔兩星期便來港採購，「內地市場好大，需求大到你想像唔到，呢二百幾支酒，兩個星期又冇晒。我仲會去其他酒鋪睇，真係唔可以諗，有幾多便掃幾多。」
經常深港兩邊走的她，指着其中一箱 Mouton二千年紅酒，「幾個月前先八千幾，依家要過萬，升得咁快，真係要掃，買得十八支都唔係好夠。」她越說越起勁，「最近內地好多人搵瑪歌紅亭（ Pavillon Rouge），好似○七年嘅，三個月前六百蚊一支，依家要千四蚊，呢度只得百二支，我全部要晒。」
事實上，紅酒價格在這兩年間大幅上升，上月底蘇富比在香港舉行的紅酒拍賣會，其中三瓶一八六九年的 Lafite，被一名透過電話出價的買家，以每瓶一百八十一萬五千元（連佣金）投得，破了世界紀錄。
有行內人指該買家是國內人，老牌酒商 Berry Bros.& Rudd香港主席梅國基亦認同此說法，更指這個價錢雖然有點瘋狂，但拍賣會後亦扯高其他紅酒升值兩成，導致國內人更瘋狂掃貨，「冇辦法啦，依家第二度搵錢容易，好多人閒閒哋都有幾百萬嘅酒。」

拍賣會過後，年初售三萬多元的八二年 Lafite，頓時升值至四萬八千元一支。

歐小姐（左）花了廿分鐘，便在尖沙咀一間酒鋪掃了逾百萬元紅酒，即時拿出數萬元人民幣付訂金。（于港民攝）

上月底蘇富比在港舉行的紅酒拍賣會，有神秘買家，以天價投得三支一八六九年 Lafite的標準瓶裝。